Posts Tagged ‘اختبارات’

الاختبارات عالأبواب + بعض النصائح لمذاكرة أفضل

5 يونيو 2010

بسم الله الرحمن الرحيم

الاختبارات قربت خلاص ! باقي كم أسبوع بس .. سبحان الله

أحس لسا قبل كم يوم  خلصنا الترم الأول =”)

كثير أشياء صارت في دي الفترة لكن مرت بسرعة فائقة

فاكرين التدوينة اللي حطيت فيها صور كتبي دا الترم و توقعاتي بشأن كل مادة ؟

حسنا ، توقعاتي لم تصب جميعها و لكن الذي حدث هو التالي

  • الحديث .. لا تعليق =]
  • علم البيئة .. طلعت كثييرة و مليانة تعداد بس حلوة
  • الرياضيات .. المستوى الثالث مو بس قبيح =/ عجبني آخر باب =] والأبلة ممتازة ^_^
  • الكيمياء .. أنواع التخبيص والأبلة كويسة في الشرح
  • الكفايات اللغوية .. أبلتين درسونا في دا الترم و ماشي حالها كمادة ^^”
  • التربية المهنية .. المادة يجي منها
  • الانجليزي .. روح الله يوفقك يا حق ، أحسن مادة XD خصوصا إنها تدعم موقفي الارتجاليP:

الحمدلله ختمنا علم البيئة و العربي و الرياضيات بس باقي المراجعة ..

زي ما يعرفوا كثير من اللي يتابعوني على تويتر والفيس بوك .. كنت جدا محتارة آخد ترم صيفي ولا لأ

في النهاية قررت ما آخد لاني بالقوة حانجح دا الترم أصلا و ماني فايقة أدرس في الصيف ..

بالإضافة إلى انهم قفلوا التسجيل على ما أظن =/

في إنتظار العطلة الصيفية بفااارغ الصبر ! =”)

~::~

قريب حضرت دورة التقنيات السرية للتفوق الدراسي اللي يقدمها د.خالد أبو الشامات

و الشكر لله أولا ثم صديقتي العزيزة ندى =] << كتبت اسمك في تدوينة مين قدك !؟ P:

و هنا صورة الشهادة + السي دي + البطاقة + الملزمة + البروشور خخخ المجموعة الكاملة P:

بعد الاستذان من الدكتور .. قررت اني أكتب أهم شيء من الدورة عشان تستفيدوا =)

  • توكلوا على الله ..
  • حددوا أهدافكم ..
  • ثقوا بقدراتكم ..
  • نظموا أوقاتكم ..
  • كونوا إيجابيين ..
  • استمتعوا بالمذاكرة ..

دي الأساسيات في الدورة و الدكتور تطرق لكل وحدة بالتفصيل ..

ما حأقدر أكتب التفاصيل لأكثر من سبب بس عموما حاكتب كم نصيحة بشأن المذاكرة ..

1- هيئوا الجو للمذاكرة و حمسوا نفسكم

2- قسموا المادة اللي تبغوا تذاكروها

نجي لأهم شيء .. انه عقل الانسان مدة استيعابه من 30 لـ 45 دقيقة ..,

يعني دي أقصى مدة تذاكروا فيها .. بعدها خدوا بريك من 10 لـ 15 دقيقة وارجعوا كملوا ..,

~::~

خاارج التدوينة ..~

عن نفسي لمن أجي أذاكر و قد كتبتها في تويتر .. انه نص وقت المذاكرة يروح في تهيئة الجو

ألبس الكيمونو “الصيني” وهو أقرب ما يكون إلى الياباني 😛 << تضحك على نفسها

و اتفرج لي حلقة من دراما يابانية خاصة للمذاكرة بالنسبة ليا .. عشان اتحمس

قبل لا ابدأ ، اسوي لي هوت شوكليت <<< تبا أحس اني يااي وانا اكتب دي الكلمة XD

~::~

أدعية المذاكرة و ما إلى ذلك .. كتبت لي هيا بنت خالتي جزاها الله خير ..

قبل المذاكرة :-

“اللهم إني اسألك فهم النبيين و حفظ المرسلين و الملائكة المقربين ،

اللهم اجعل ألسنتنا عامرة بذكرك و قلوبنا بخشيتك و أسرارنا بطاعتك

إنك على كل شيء قدير ، حسبنا الله ونعم الوكيل”

بعد المذاكرة :-

“اللهم إني استودعك ما قرأت و ما حفظت وما تعلمت فرده إلي عند حاجتي إليه

إنك على كل شيء قدير ، حسبنا الله ونعم الوكيل”

يوم الامتحان :-

“اللهم إني توكلت عليك و سلمت أمري إليك لا ملجأ و لا منجا منك إلا إليك”

عند دخول القاعة :-

“رب ادخلني مدخل صدق و اخرجي مخرج صدق واجعل لي من لدنك سلطانا نصيرا”

قبل البدء بالحل :-

“بسم الله الرحمن الرحيم

رب اشرح لي صدري و يسر لي أمري و احلل عقدة من لساني يفقه قولي

بسم الله الفتاح ، اللهم لا سهل إلا ما جعلته سهلا و انت إن شئت تجعل الحزن سهلا”

أثناء الامتحان :-

“لا إله إلا أنت سبحانك إني كنت من الظالمين ، ياحي يا قيوم برحمتك أستغيث

رب إن مسني الضر وأنت أرحم الراحمين”

عند النسيان :-

“اللهم يا جامع الناس في يوم لا ريب فيه اجمع علي ضالتي”

بعد الانتهاء من الامتحان :-

“الحمدلله الذي هدانا لهذا و ما كنا لنهتدي لولا أن هدانا الله”

~::~

أتمنى لي ولكم التوفيق من الله عز وجل =)

تحياتي

 

الإعلانات

قالوا عن الارتجال { 1 }

26 مايو 2010

بسم الله الرحمن الرحيم

ماشاء الله تبارك الله ، أعوذ بكلمات الله التامات من شر ما خلق

اللهم بارك لنا فيما رزقتنا وقنا عذاب النار .. سبحان الله وبحمده ، سبحان الله العظيم

انشر تؤجر 😛

نرجع لموضوعنا اللي هو الارتجال .. وتعريفه لمن لا يعرف معناه هو اختراع حاجة في نفس اللحظة !

والويكيبيديا تقول: الارتجال هو إِنجاز عفوي مباشر .. ما اختلفنا =]

وللعلم مالها أي علاقة بكلمة استرجال =S كل ما قلت لأحد حارتجل يصير وجهه O_o”

عموما انا هنا أحدثكم من هذا المنبر عن مواقفي الارتجالية ولمن لا يعلم أيضا أنا سيدة الارتجال 😛

ما قد جاء اختبار انجليزي تحريري كان أو شفوي الا وارتجلت ولله الحمد النتايج مو بطالة !

in Fact النتايج مرة حلوة والحمدلله D=

افتكر مرة كان المفروض نكتب عن رحلة سياحية لأي دولة لمدة أسبوع تقريبا وانا كتبت عن

اليابان <<< فيه أحد اتوقع غير كدا ؟! 😛

لمن جيت أكتب لاحظت اني ما أعرف كثير من معالم اليابان لذلك كتبت أسماء شخصيات انميXD

اسمه بليتش وركبتها مع بعض على أساس انها منتزهات و أماكن للزيارة ..,

افتكر اني كتبت I’ll go to [ rangiku san no haineko ] 😛

رانجيكو هو اسم الشخصية  .. سان لقب بعد الاسم للاحترام ..

نو يدل على الملكية .. هاينيكو اسم سلاحها

معناها .. السيف الخاص بالآنسة رانجيكو ! خخخخ

كمان على ما أظن كتبت The park [ hitsugaya taichou ] XD

منتزه [ الكابتن هيستوجايا ] اللي هو الولد الكيوت اللي فوق 😛

~::~

أحسن شيء اني كنت أبغى اكتب نصب السلام التذكاري اللي في هيروشيما

by ShureVan

المشكلة ما أعرف أكتب نصب ! قمت كتبت half-destroyed building

مع العلم اني اخترعت كلمة هاف ديسترويد وانا أكتب XD بعدين طلعت صح الحمدلله

الجدير بالذكر اني كتبت انه في ناجازاكي مو هيروشيما 😛

دا في اختبار الترم الأول من سنة أولى والحمدلله انه ولا وحدة من المصححات تعرف شيء عن اليابان 😛

~::~

مرة من المرات الأبلة سألت عن معنى كلمة Recognizable قلت “قابل للإدراك” XD

ما يستفاد من التدوينة انه مو لازم تذاكروا كل حرف .. عادي لو ارتجلتوا =]

ترقبوا تدوينات أخرى عن الارتجال 😛 يمكن ..,

تحياتي ..

خلصنا الترم الأول :”)

7 فبراير 2010
بسم الله الرحمن الرحيم

أما بعد مديراتي الفاضلات معلماتي العزيزات أخواتي الطالبات نبدأ إذاعتنا الصباحـ…

طييييينوووط <<< المايك يستهبل كالعادة ..

المهم أحب أقولكمـ إننا خلصنااااااااااااااا لمن لا يعلم يعني ترا خلصنا خللللصنننا وووهوووو

هنيئا لنا :””) ما تبقى من الأسبوع .. الحمدلله لقد خلصنا

بالمناسبة القرد اللي فوق المفروض يتحرك فما أدري هو سوا اللي عليه ولا لأ

لذلك نشر مفاجئ للتدوينة P: || اكتشفت انه القرد ما يتحرك :/ سحقا له

طيب الظاهر لازم أرفع الصور على مركز رفع عادي << ما يحتاج تفكري بصوت عالي -_-

التدوينة دي شماتة في كل من لسا يختبر قبل أن تكون احتفالا ..,

كااااااااااااااااي عندكم اختباراات يا مساكين P:

الحمدلله انا ما عندي .. ني ني نينينا :]

بلغة أخرى { خ ل ص ن ا } = خلصنا = انتو ما خلصتوا واحنا خلصنا D=

حبيت أعبر عن شعوري الذي لا يوصف و سعادتي الغامرة اننا انتهينا من الترم الأول

خلاص والله من جد ^^” قررت أبعد عن اللاب لـ كم يوم كدا

لانه فيه عِرق في مخي طلع من الجهد اللي يبذله دماغي و اللي ما ادري ايش دخله في الحكاية

بناء على ذلك تم إعفائي من الخدمة الاجتماعية في الشبكات النتية و منها بلوجر ..

و عندي ليست بـ كم شيء ابغا أسويهم إن شاء الله في الإجازة ^_^

ما حأكتبها هنا لسببين :-
1- ما فيني حيل :]
2- ما ابغا اتفشل لو خلصت الإجازة وانا ما سويتها P:

فإذا تفضلتم اللي عنده أي اقتراح لا يبخل علينا 🙂

في الهامش أو بما معناه ترا ما ابغا أحد يزعل ^^” بس امزح

تحديث // استلمت الشهادة اليوم الأربعاء و الحمدلله النتيجة كويسة جدا 🙂

في أمان الله

مقتطفات مدرسية

23 يناير 2010
بسم الله الرحمن الرحيم
كنت اتصفح التدوينات القديمة .. ومريت على تدوينة أول أسبوع مدرسي .., للفايقـين فقـط !
العنوان خلاني أطيح من عيني .. للفايقين فقط !؟ هههههه الله يستر علينا ..
غيابي دا الترم اتعدى الحدود .. أحس لو حسبت الأيام اللي غبت فيها حيصير نصف مرة / أسبوع ..
<<< الله يقلع الفيزيـاء مؤثـر فيا بقـوة ×__×
~::~
كان فصل دراسي جيد صراحة ^_^ ما ادري ايش الجيد بالضبط بس يلا P:
اتعرفت على بنات من أكوس بنات العالم 🙂
و الأبلات يحبوني :× خصوصا أبلة الفيزياع <<< كثري منها ..
مرة أبلة التفسير كتبت اسمي عشان تنقصني وكتبت السبب : لقافة ههههههه
عشان دايما اتلقف في حصتها .. صراحة هي مو لقافة .. بس تعليقات XD
~::~
حافتقد حصص المهارات اللي دايما نحشش فيها :”)
مرة الأبلة سألت : ايش تسوي الأسرة قبل لا تخرج في نزهة ؟
الإجابة هي : التخطيط وتوزيع المهام وما إلى ذلك ..
انا قلت : يدخلوا الحمام-وانتو بكرامة- << معذورة والله خخخ
غير درس الوطنية الجميل اللي شرحته بجلالة قدري P:
وفيه أشدت بالتعليم عندنا و النظافـة والنظام ههههه مع احترامي للجميع 🙂
ملف المادة كان جماعي والحمدلله كل بنت من المجموعة سوت اللي عليها وزيادة ^_^
~::~
اليوم ( السبت ) كان اختبار الأحياء العملي .. لمن كانت الأبلة تنادي الأسامي عشان تشوف مين غايبة ..
قالت : سبايو ..؟ انا : نعم .. بعدين قالت : محمد ..؟ وهاتك يا ضحك ههههه
اول مرة ادري انه معانا في الفصل واحد اسمه محمد XD <<<< باآيخـة
~::~
استلمنا كتب الترم التاني 🙂 وابشركم المواد تجيب الهم ..

-الحديث .. مو عشان شيء بس أبلته تكره الواحد في الشيء ..
-علم البيئـة .. دخل مزاآجي بقـووة ^__^ يكفي تصميمه اللي يفتح النفس ..
-الرياضيات .. حبيبي أصلا بدون كلام .. والأبلة هي نفسها ^^
-الكيميـاء .. الله يستر منهـ .. بس مع الأبلة اللي حتدرسنا إن شاء الله يكون تمام 🙂
-تربية مهنية .. المـاآدة مرة حلوة لكن الأبلة .. ياآرب ما تكون اللي في بالي
-كفايات لغوية .. مـاشي حالها :/
-انجليزي .. الحمدلله بس أبلتنا مدري ايش تبغى .. “لسا ما استلمنا الكتاب”

أسـاسا إلى يومكمـ هذا واحنا لسا ما خلصنا المنهج حق الانجليش ! وكتاب التمارين مغبر 😐
بالإضافة إلى الفيزياء اللي اختبارنا العملي فيه يوم الاثنين .. الأبلة لسا ما راجعت لنا التجارب كلها ..
~::~
اليوم نزل جدول الاختبارات .. لا بأس به بالنسبة ليا ^_^
الإنجاز في الموضوع اننا حنخلص الأحد :””””) أول مرة في تاريخي المدرسي ..
احم .. طلاب وطالبات المدارس العامّة الرجاء قولوا ماشاء الله P:
~::~
كتبت في التدوينة المذكورة أعلاه << متعوب عليها | عن بنات فصل محدد أكرهه ..
ما اتوقعت أبدا انهم حيصيروا من أحب بنات الفصل إلى قلبي 🙂
~::~
في النهاية أحب أقولكمـ .. ادعوولنا :”””(
الله يوفق كل طالب وطالبة و يسهل لهم وييسر أمرهمـ ياآرب ..
تحياتي .. سبايو